မၢႆတွင်းၶေႃႈသင်ႇ
ၸုမ်းပၢႆးပၺ်ႇၺႃႇ ငဝ်ႈငုၼ်းမုၵ်ႉၸုမ်းလူင်သင်ႇၶၸိုင်ႈတႆး
ပီ ၵၢၼ်ႁဵၼ်း 2025 - 2026
ပပ်ႉၼႆႉ ပဵၼ်ပပ်ႉၽိုၼ်မၢႆဢွင်ႇလိၵ်ႈ ၶွင်ပၢင်တႅမ်ႈတွပ်ႇလိၵ်ႈ ပရိယတ်ႉတိသတ်ႉထမ်ႇမပႃႇလၵႅၼ်ႇၸဝ်ႈ ၸိုင်ႈတႆး ထူၼ်ႈ(68)ပီ၊ ပီၵၢၼ်ႁဵၼ်း 2025-2026 ဢၼ်ၸုမ်းပၢႆးပၺ်ႇၺႃႇ ငဝ်ႈငုၼ်းမုၵ်ႉၸုမ်း လူင်သင်ႇၶၸိုင်ႈတႆး လႆႈပိုၼ်ၽၢဝ်ႇဢွၵ်ႇ မိူဝ်ႈပီတႆး 2120 ၊ ပီၵေႃးၸႃႇ 1387၊ လိူၼ်ႁႃႈမႂ်ႇ 15 ၶမ်ႈ၊ ဝၼ်းပုတ်ႉ ဝၼ်းထိ (01.04.2026) ၼၼ်ႉၶႃႈယဝ်ႉ။ ၸုမ်းပၢႆးပၺ်ႇၺႃႇ ငဝ်ႈငုၼ်းမုၵ်ႉၸုမ်းလူင်သင်ႇၶၸိုင်ႈတႆး လႆႈၸတ်းႁဵတ်း ပၢင်တႅမ်ႈတွပ်ႇလိၵ်ႈ မိူင်းႁူမ်ႈတုမ်မျၢၼ်ႇမႃႇပတ်းပိုၼ်ႉ ပီၵၢၼ်ႁဵၼ်း 2025-2026 ၼႆႉ ၶၢဝ်းတၢင်း (9) ဝၼ်း၊ တႄႇဢဝ် မိူဝ်ႈပီတႆး 2120 ၊ လိူၼ်သၢမ်လွင်ႈ 12 ၶမ်ႈ တေႃႇ လိူၼ်သီႇမႂ်ႇ 6 ၶမ်ႈ၊ ဝၼ်းထိ 13.02.2026 တေႃႇထိုင် 21.02.2026 ၼၼ်ႉယဝ်ႉ။ ၼႂ်းပၢင်တႅမ်ႈတွပ်ႇလိၵ်ႈၼႆႉ လႆႈဢဝ်ပိူင်လၵ်းသုတ်ႇမႂ်ႇသေ တႅမ်ႈတွပ်ႇ ယဝ်ႉတူဝ်ႈၵႂႃႇ ပီထူၼ်ႈႁႃႈယဝ်ႉဢေႃႈ။ ပိူင်တမ်းၸၼ်ႉ ၸုမ်းပၢႆးပၺ်ႇၺႃႇ ငဝ်ႈငုၼ်းမုၵ်ႉၸုမ်းလူင်သင်ႇၶၸိုင်ႈတႆး မီးဝႆႉ ၸၼ်ႉဢွၼ်၊ ၸၼ်ႉငဝ်ႈ သၢမ်ၸၼ်ႉ၊ ၸၼ်ႉၵၢင် သၢမ်ၸၼ်ႉ လႄႈ ၸၼ်ႉသုင် သၢမ်ၸၼ်ႉ ၼႆၼၼ်ႉ ပီၼႆႉ လႆႈတွပ်ႇၵႂႃႇပႅတ်ႇၸၼ်ႉ- ၸၼ်ႉဢွၼ်၊ ၸၼ်ႉငဝ်ႈ သၢမ်ၸၼ်ႉ၊ ၸၼ်ႉၵၢင် သၢမ်ၸၼ်ႉ၊ ၸၼ်ႉသုင် ပီၼိုင်ႈၶႃႈယဝ်ႉ။
ၼႂ်းပီၼႆႉ မီးလုၵ်ႈႁဵၼ်း ၸဝ်ႈသင်ႇၶ၊ ၸဝ်ႈၶၢဝ် လႄႈ ၵူၼ်းႁိူၼ်း ႁူမ်ႈၵၼ်ၶဝ်ႈတွပ်ႇ 16410 ၸဝ်ႈ/ၵေႃႉ (ပီၵၢႆ 2024-2025 ၶဝ်ႈတွပ်ႇ 13685 ၊ ပီၼႆႉ ၼမ်လိူဝ်ပီၵၢႆ 2725) သေ ဢွင်ႇပူၼ်ႉၵႂႃႇ 14556 ၸဝ်ႈ/ၵေႃႉ (ပီၵၢႆ ဢွင်ႇပူၼ်ႉ 12340 ၊ ၼမ်လိူဝ်ပီၵၢႆ 2216)။ လုၵ်ႈႁဵၼ်း ဢၼ်ဢွင်ႇပူၼ်ႉ ၼႂ်းပီၵၢၼ်ႁဵၼ်း 2025-2026 ၼႆႉ မီးယူႇ 88.7%၊ ပီၵၢႆ ဢွင်ႇပူၼ်ႉ 90.2%၊ ပီဢွၼ် ဢွင်ႇပူၼ်ႉ 88.5% ၼႆလႄႈ ပေႃးဢဝ်ႁူဝ်ပၢၵ်ႇ မၼ်းဝႃႈ ပီလႄႈပီ ဢမ်ႇပေႃးပိူင်ႈၵၼ်ၵႃႈႁိုဝ်။ ပီၵၢၼ်ႁဵၼ်း 2025-2026 ၼႆႉ ၵၢၼ်ဝၢၼ်ႈမိူင်းၵေႃႈ ၸင်ႇႁႃၼိမ်သဝ်းမႃးၵူၺ်း ဝႃႈၼႆသေတႃႉ လႆႈႁၼ် ၸဝ်ႈသြႃႇ၊ ၸဝ်ႈၶူး၊ ၸဝ်ႈၶၢဝ်၊ တၵႃႇပတ်ႉၸေးသီႇပိူင် လႄႈ လုၵ်ႈႁဵၼ်းႁဝ်းၶဝ် ဢဝ်ႁႅင်းတူဝ်၊ ႁႅင်းၸႂ်၊ ႁႅင်းၶူဝ်းၶွင် လႄႈ ႁႅင်းပၺ်ႇၺႃႇသေ ၶတ်းၸႂ်ၶဝ်ႈတွပ်ႇ ႁႂ်ႈပေႃးယဝ်ႉတူဝ်ႈလီငၢမ်းသေယဝ်ႉ၊ သမ်ႉယင်းဢွင်ႇပူၼ်ႉ တိူဝ်းလိူဝ်မႃး ပီလႂ် ပီၼၼ်ႉ ၼင်ႇၼႆၼႆႉ ပဵၼ်ႁႅင်းသူၼ်း တႃႇၸိုၼ်ႇပီၼႃႈ လႄႈ ပဵၼ်မုတိတႃႇ ႁူမ်ၸူမ်းၸွမ်း ၵူႈတူင်ႇဝဵင်း၊ ၵူႈၵၢၼ်ႇၵျွင်း၊ ၵူႈၸဝ်ႈ ၵူႈမုၼ် ၵူႈတူၼ် ၵူႈၵေႃႉ တႃႇပီၼႆႉတေႉတေႉယဝ်ႉၶႃႈ။
ဢွင်ႈတွပ်ႇလိၵ်ႈ ပီၵၢၼ်ႁဵၼ်း 2025-2026 ၼႆႉ မီးမႃး 42 တူင်ႇဝဵင်း၊ ယွၼ်ႉသၢႆငၢႆငဝ်းလၢႆး ဝၢၼ်ႈမိူင်းလႄႈပၢႆးမၢၵ်ႈမီးသေ တူင်ႇဝဵင်းဢၼ်ဢမ်ႇၸတ်းႁဵတ်း ပၢင်တွပ်ႇလိၵ်ႈၵေႃႈ မီး၊ ဝၢင်တူင်ႇဝဵင်းၵေႃႈ လႆႈၵႂႃႇၶဝ်ႈႁူမ်ႈ တႅမ်ႈတွပ်ႇၸွမ်း တၢင်ႇတူင်ႇဝဵင်းၵေႃႈ မီးၶႃႈယဝ်ႉ။ ဝႃႈၼၼ်သေတႃႉ ၼႂ်းၶၢဝ်းတၢင်း 5 ပီၼႆႉ လႆႈဝႃႈပီၼႆႉ ဢွင်ႈတွပ်ႇလိၵ်ႈႁဝ်းၶႃႈ ၼမ်လိူဝ်ၵူႈပီ ၼႆၶႃႈယဝ်ႉ။ ၼႂ်းတူင်ႇဝဵင်းၸိူဝ်းၼႆႉ ၽိသဵတ်ႇ မၼ်းၸမ်ႉ ဢွင်ႈတွပ်ႇလိၵ်ႈတီႈမႂ်ႇ ဢၼ်ဢဝ်လိၵ်ႈမိူင်း (လိၵ်ႈၶိုၼ်) သေ ၶဝ်ႈတႅမ်ႈတွပ်ႇ ၼႂ်းလၵ်းသုတ်ႇမႂ်ႇႁဝ်းၶႃႈၼႆႉ ပဵၼ်ႁူင်းႁဵၼ်းပရိယတ်ႉတိထမ်း၊ မိူင်းၽူင်း၊ တႃႈၶီႈလဵၵ်းၼၼ်ႉၶႃႈယဝ်ႉ။ ပဵၼ်ဢၼ် လီဢဝ်ၵုင်ႇမုၼ် လႄႈ မုတိတႃႇၸွမ်းတေႉတေႉၶႃႈ။ ပေႃးဢဝ်ႁူဝ်ၵျွင်း ဢၼ်ၶဝ်ႈတွပ်ႇ ပီၼႆႉ မီး 609 ၵျွင်း၊ ပီၵၢႆ ၶဝ်ႈတႅမ်ႈတွပ်ႇ 527 ၵျွင်း၊ ပီၼႆႉ တိူဝ်းၶိုၼ်ႈမႃး 82 ၵျွင်း၊ သင်ဝႃႈ ဝၢၼ်ႈမိူင်းလႄႈပၢႆးမၢၵ်ႈမီး ၼိမ်ယဵၼ်မႃးၸိုင် ႁူဝ်ၵျွင်း ဢၼ်တေၶဝ်ႈတွပ်ႇလိၵ်ႈႁဝ်းၶႃႈ တိုၼ်းတိူဝ်းၼမ်လိူဝ်ၼႆႉထႅင်ႈတင်းၼမ်ယူႇၶႃႈယဝ်ႉ။
ၼႂ်းသဵၼ်ႈမၢႆဢွင်ႇၼႆႉ ၸိုဝ်ႈလုၵ်ႈႁဵၼ်းၸိူဝ်းၼၼ်ႉ ဝၢင်ဝဵင်းၵေႃႈ ၶိုၼ်းဝႆႉၸွမ်းၼင်ႇ ဢၼ်ၸုမ်းပၢႆးပၺ်ႇၺႃႇတူင်ႇဝဵင်းၶဝ် သူင်ႇမႃးပၼ်ၼၼ်ႉၵူၺ်း၊ ယွၼ်ႉတဵမ်ထူၼ်ႈယူႇလႄႈ ဢမ်ႇလႆႈလႅၵ်ႈလၢႆႈ၊ ၵူၺ်းၵႃႈ ဝၢင်တူင်ႇဝဵင်း တႅမ်ႈပဵၼ် ပႃႇလိတႆး တႅတ်ႈၼႅတ်ႈသေတ ဝၢင်တူင်ႇဝဵင်းတႄႉ ဢဝ်လိၵ်ႈတႆးသေ တႅမ်ႈမႃးၵူၺ်း။ လိူဝ်သေၼ်ႉ ထႅင်ႈပိူင်ၼိုင်ႈၵေႃႈ လၢႆးဝႆႉဝၢင်း လႄႈ လွင်ႈပၼ်ထၢၼ်ႈမၼ်း ဢၼ်ဝၢင် တူင်ႇဝဵင်း သူင်ႇမႃးၼၼ်ႉ ၸၢင်ႈတေမီး တီႈၽိတ်းပိူင်ႈယူႇၵမ်ႈၽွင်ႈ။ ယွၼ်ႉၼၼ် သင်ဝႃႈႁၼ်မႅၼ်ႈၺႃး တီႈၽိတ်းပိူင်ႈၼႆၸိုင် ၶႅၼ်းတေႃႈပွင်ႇၸႂ်ပၼ်သေ ၶိုၼ်းပွင်ႇၶၢဝ်ႇပၼ် ၽူႈပွင်ၵၢၼ် ၸုမ်းပၢႆး ပၺ်ႇၺႃႇႁဝ်းၶႃႈ ႁႂ်ႈၶိုတ်းတၼ်းသေၵမ်းၶႃႈ။
ၸုမ်းပွင်ၵၢၼ် ပၢႆးပၺ်ႇၺႃႇ
ငဝ်ႈငုၼ်းမုၵ်ႉၸုမ်းလူင်သင်ႇၶၸိုင်ႈတႆး၊ ဝဵင်းပၢင်လူင်။
25.03.2026
ပီ ၵၢၼ်ႁဵၼ်း 2023 - 2024
ယူႇတီႈၸုမ်းပၢႆးပၺ်ႇၺႃႇ ငဝ်ႈငုၼ်းမုၵ်ႉၸုမ်းလူင်သင်ႇၶၸိုင်ႈတႆး လႆႈၸတ်းႁဵတ်း ပၢင်တႅမ်ႈတွပ်ႇလိၵ်ႈ မိူင်းႁူမ်ႈတုမ်မျၢၼ်ႇမႃႇပတ်းပိုၼ်ႉ တႃႇပီၵၢၼ်ႁဵၼ်း 2023-2024 ၼႆႉ ၶၢဝ်းတၢင်း (9) ဝၼ်း၊ တႄႇဢဝ် မိူဝ်ႈဝၼ်းထိ 10.02.2024 တေႃႇထိုင် 18.02.2024 ၼၼ်ႉယဝ်ႉ။ ၼႂ်းပၢင်တႅမ်ႈတွပ်ႇလိၵ်ႈၼႆႉ လႆႈဢဝ်ပိူင်လၵ်းသုတ်ႇမႂ်ႇ ဢၼ်ၸုမ်းပၢႆးပၺ်ႇၺႃႇ ၶပ်းၶိုင်မႃးၼၼ်ႉသေ တႅမ်ႈတွပ်ႇ ယဝ်ႉတူဝ်ႈၵႂႃႇ ပီထူၼ်ႈသၢမ်ယဝ်ႉဢေႃႈ။ ၸွမ်းၼင်ႇပိူင်တမ်းၸၼ်ႉ ၸုမ်းပၢႆးပၺ်ႇၺႃႇ ငဝ်ႈငုၼ်းမုၵ်ႉၸုမ်းလူင်သင်ႇၶၸိုင်ႈတႆး မီးဝႆႉ ၸၼ်ႉဢွၼ်၊ ၸၼ်ႉငဝ်ႈ သၢမ်ၸၼ်ႉ၊ ၸၼ်ႉၵၢင် သၢမ်ၸၼ်ႉ လႄႈ ၸၼ်ႉသုင် သၢမ်ၸၼ်ႉၼၼ်ႉ ပီၼႆႉ လႆႈတႄႇတွပ်ႇ ၸၼ်ႉဢွၼ် ပီဢွၼ်တၢင်းသုတ်း လႄႈ ၼႂ်းၸၼ်ႉငဝ်ႈ ပီၼိုင်ႈၼၼ်ႉၵေႃႈ လႆႈဢဝ်ဝိၶျႃးလိၵ်ႈမၢၼ်ႈ ၶဝ်ႈတႅမ်ႈတွပ်ႇၸွမ်းၵႂႃႇ ၼႂ်းပီၼႆႉ ၼင်ႇၵဝ်ႇယဝ်ႉၶႃႈ။ လိူဝ်သေၼၼ်ႉ လႆႈဢွၼ်ၵၼ် ၶဝ်ႈတွပ်ႇၵႂႃႇ ၸၼ်ႉငဝ်ႈ သၢမ်ၸၼ်ႉ၊ ၸၼ်ႉၵၢင် ပီၼိုင်ႈ၊ ပီသွင်လႄႈ ပီၼႆႉ မီးၵႂႃႇ ႁူၵ်းၸၼ်ႉယဝ်ႉၶႃႈဢေႃႈ။
လုၵ်ႈႁဵၼ်း ဢၼ်ၶဝ်ႈတႅမ်ႈတွပ်ႇလိၵ်ႈၵႂႃႇ ၼႂ်းပီၼႆႉ မီးၸဝ်ႈသင်ႇၶ လႄႈ လုၵ်ႈႁဵၼ်း 11596 ၸဝ်ႈ/ၵေႃႉ (ပီၵၢႆ ၶဝ်ႈတွပ်ႇ 11230၊ ၼမ်လိူဝ်ပီၵၢႆ 366) သေ ဢွင်ႇပူၼ်ႉၵႂႃႇ 10260 ၸဝ်ႈ/ၵေႃႉ (ပီၵၢႆ ဢွင်ႇပူၼ်ႉ 8101၊ ၼမ်လိူဝ်ပီၵၢႆ 2159)။ လုၵ်ႈႁဵၼ်းဢၼ်ဢွင်ႇပူၼ်ႉ ၼႂ်းပီၵၢၼ်ႁဵၼ်း 2023-2024 ၼႆႉ မီးယူႇ 88.5 % (ႁူဝ်ပၢၵ်ႇပႅတ်ႇသိပ်းပႅတ်ႇပၢႆ)၊ ပီၵၢႆ ဢွင်ႇပူၼ်ႉ 72.1% ၼႆလႄႈ ပေႃး ဢဝ်ႁူဝ်ပၢၵ်ႇမၼ်းဝႃႈ ၶိုၼ်ႈမႃးယူႇသေတႃႉၵေႃႈ ဢၼ်ၶိုၼ်းသိုပ်ႇၶိုၼ်ႈ ၸၼ်ႉတၢင်းၼိူဝ်မႃးၼၼ်ႉ လႆႈဝႃႈ ယွမ်းၵႂႃႇ ၼိုင်ႈၶိုင်ႈၵွၼ်ႇၶႃႈယဝ်ႉ။ ဢၼ်လီပဵၼ်ႁႅင်းၸႂ်တႄႉၵေႃႈ မီးယူႇလွင်ႈၼိုင်ႈၶႃႈ၊ သမ်ႉဝႃႈ ၸၼ်ႉလိၵ်ႈ သုင်မႃး၊ ဝိၶျႃးၵေႃႈ ၼမ်မႃး၊ လိၵ်ႈမၼ်းၵေႃႈ ယၢပ်ႇတိူဝ်းမႃး၊ ၵၢၼ်ဝၢၼ်ႈမိူင်းၵေႃႈ သုၵ်ႉသၵ်ႉ ဢမ်ႇၼိမ်သဝ်းသေ လႆႈႁၼ် ၸဝ်ႈသြႃႇ၊ ၸဝ်ႈၶူး လႄႈ လုၵ်ႈႁဵၼ်းႁဝ်းၶဝ် ၶတ်းၸႂ်တင်ႈ ဢွင်ႈတွပ်ႇလိၵ်ႈ လႄႈ ၶတ်းၸႂ်ၶဝ်ႈတွပ်ႇ ႁႂ်ႈပေႃးယဝ်ႉတူဝ်ႈလီငၢမ်းယဝ်ႉ သမ်ႉမီးၼမ်ႉၵတ်ႉ ဢွင်ႇပူၼ်ႉလိူဝ်မႃးသေ ၵူႈပီၼၼ်ႉ ပဵၼ်ႁႅင်းၸႂ် တႃႇပီၼႃႈ လႄႈ ပဵၼ်မုတိတႃႇ ႁူမ်ၸူမ်းၸွမ်း ၵူႈတူင်ႇဝဵင်း၊ ၵူႈၵၢၼ်ႇၵျွင်း၊ ၵူႈၸဝ်ႈ ၵူႈမုၼ် ၵူႈတူၼ် ၵူႈၵေႃႉတေႉတေႉယဝ်ႉၶႃႈ။ ဢွင်ႈတွပ်ႇလိၵ်ႈႁဝ်းၶႃႈ ၼႂ်းပီၵၢၼ်ႁဵၼ်း 2023-2024 ၼႆႉ မီးဝႆႉ41 တူင်ႇဝဵင်းသေတႃႉ၊ ဝၢင်တူင်ႇဝဵင်းသမ်ႉ ယွၼ်ႉငဝ်းလၢႆးဝၢၼ်ႈမိူင်းလႄႈ ဢမ်ႇပဵၼ်တွပ်ႇၵေႃႈ မီး၊ ဝၢင်တူင်ႇဝဵင်းၵေႃႈ လႆႈၵႂႃႇၶဝ်ႈႁူမ်ႈ တႅမ်ႈတွပ်ႇၸွမ်း တၢင်ႇတူင်ႇဝဵင်းၵေႃႈ မီးၶႃႈယဝ်ႉ။
ၼႂ်း 41 တူင်ႇဝဵင်းၼၼ်ႉ ပဵၼ်ၼႂ်းမိူင်းတႆး၊ မိူင်းယၢင်းလႅင်၊ မိူင်းယၢင်းၽိူၵ်ႇ၊ မိူင်းၶၢင်၊ တိူင်းမၼ်းတလေး လႄႈ တိူင်းတႃႈၵုင်ႈ ထုင်ႉလိၼ်ပဵင်း ၸိူဝ်းၼႆႉသေ ႁူဝ်ၵျွင်း ဢၼ်ၶဝ်ႈမႃးတႅမ်ႈတွပ်ႇ မီး 485 ၵျွင်း၊ ပီၵၢႆ ၶဝ်ႈတႅမ်ႈတွပ်ႇ 493 ၵျွင်း၊ လႆႈဝႃႈ ပီၼႆႉ ယွမ်းလူင်းၵႂႃႇ 8 ၵျွင်းဝႃႈၼႆသေတႃႉ သင်ဝႃႈ ဝၢၼ်ႈမိူင်းၵတ်းယဵၼ်ၸိုင် ႁူဝ်ၵျွင်း ဢၼ်ၶဝ်ႈတွပ်ႇလိၵ်ႈႁဝ်းၶႃႈ တေတိူဝ်းၼမ်လိူဝ်ၼႆႉထႅင်ႈတင်းၼမ်ယူႇ ယုမ်ႇယမ်ဝႆႉၼင်ႇၼႆၶႃႈဢေႃႈ။ ၼႂ်းသဵၼ်ႈမၢႆဢွင်ႇၼၼ်ႉ ၸိုဝ်ႈလုၵ်ႈႁဵၼ်းၸိူဝ်းၼၼ်ႉ မၢင်ဝဵင်းၵေႃႈ ၶိုၼ်းဝႆႉၸွမ်းၼင်ႇ ဢၼ်ၸုမ်းပၢႆးပၺ်ႇၺႃႇၶဝ် သူင်ႇမႃးပၼ်ၼၼ်ႉၵူၺ်း ဢမ်ႇလႆႈယႃႉသင်၊ မၢင်ႇတူင်ႇဝဵင်း တႅမ်ႈပဵၼ် ပႃႇလိတႆး တႅတ်ႈၼႅတ်ႈသေတ မၢင်ႇတူင်ႇဝဵင်းတေႉ ဢဝ်လိၵ်ႈတႆးသေ တႅမ်ႈမႃးၵူၺ်း။ ထႅင်ႈပိူင်ၼိုင်ႈၵေႃႈ လၢႆးဝႆႉဝၢင်း လႄႈ လွင်ႈပၼ်ထၢၼ်ႈမၼ်းၼၼ်ႉ ၸၢင်ႈတေမီး တီႈၽိတ်းပိူင်ႈယူႇၵမ်ႈၽွင်ႈ။ ယွၼ်ႉၼၼ် သင်ဝႃႈႁၼ်မႅၼ်ႈၺႃး တီႈၽိတ်းပိူင်ႈၼႆၸိုင် ၶႅၼ်းတေႃႈပွင်ႇၸႂ်ပၼ်သေ ၶိုၼ်းပွင်ႇၶၢဝ်ႇပၼ် ၽူႈပွင်ၵၢၼ် ၸုမ်းပၢႆးပၺ်ႇၺႃႇႁဝ်းၶႃႈ ႁႂ်ႈၶိုတ်းတၼ်းသေၵမ်းၶႃႈ။
ၸုမ်းပွင်ၵၢၼ် ပၢႆးပၺ်ႇၺႃႇ
ငဝ်ႈငုၼ်းမုၵ်ႉၸုမ်းလူင်သင်ႇၶၸိုင်ႈတႆး
ဝဵင်းပၢင်လူင်။
08.04.2024
ပီ ၵၢၼ်ႁဵၼ်း 2022 - 2023
ယူႇတီႈၸုမ်းပၢႆးပၺ်ႇၺႃႇ ငဝ်ႈငုၼ်းမုၵ်ႉၸုမ်းလူင်သင်ႇၶၸိုင်ႈတႆး လႆႈၸတ်းႁဵတ်း ပၢင်တႅမ်ႈတွပ်ႇလိၵ်ႈ မိူင်းႁူမ်ႈတုမ်မျၢၼ်ႇမႃႇပတ်းပိုၼ်ႉ တႃႇပီၵၢၼ်ႁဵၼ်း 2022-2023 ၼႆႉ ၶၢဝ်းတၢင်း (9) ဝၼ်း၊ တႄႇဢဝ် မိူဝ်ႈဝၼ်းထိ 19.02.2023 တေႃႇထိုင် 27.02.2023 ၼၼ်ႉယဝ်ႉ။ ၼႂ်းပၢင်တႅမ်ႈတွပ်ႇလိၵ်ႈၼႆႉ လႆႈဢဝ်ပိူင်လၵ်းသုတ်ႇမႂ်ႇ ဢၼ်ၸုမ်းပၢႆးပၺ်ႇၺႃႇ ၶပ်းၶိုင်မႃးၼၼ်ႉသေ တႅမ်ႈတွပ်ႇ ယဝ်ႉတူဝ်ႈၵႂႃႇ ပီထူၼ်ႈသွင်ယဝ်ႉဢေႃႈ။
ၸွမ်းၼင်ႇပိူင်တမ်းၸၼ်ႉ ၸုမ်းပၢႆးပၺ်ႇၺႃႇ ငဝ်ႈငုၼ်းမုၵ်ႉၸုမ်းလူင်သင်ႇၶၸိုင်ႈတႆး မီးဝႆႉ ၸၼ်ႉငဝ်ႈ သၢမ်ၸၼ်ႉ၊ ၸၼ်ႉၵၢင် သၢမ်ၸၼ်ႉ လႄႈ ၸၼ်ႉသုင် သၢမ်ၸၼ်ႉၼၼ်ႉ ပီၼႆႉ ပဵၼ်ပီထူၼ်ႈ သွင်လႄႈ လႆႈဢွၼ်ၵၼ်ၶဝ်ႈတွပ်ႇၵႂႃႇ တႃႇၸၼ်ႉငဝ်ႈ သၢမ်ၸၼ်ႉ လႄႈ ၸၼ်ႉၵၢင် ပီၼိုင်ႈၵူၺ်းဢေႃႈ။
လုၵ်ႈႁဵၼ်း ဢၼ်ၶဝ်ႈတႅမ်ႈတွပ်ႇလိၵ်ႈၵႂႃႇ ၼႂ်းပီၼႆႉ မီးၸဝ်ႈသင်ႇၶ လႄႈ လုၵ်ႈႁဵၼ်း 11229 ၸဝ်ႈ/ၵေႃႉ (ပီၵၢႆ ၶဝ်ႈတွပ်ႇ 8697၊ ၼမ်လိူဝ်ပီၵၢႆ 2532) သေ ဢွင်ႇပူၼ်ႉၵႂႃႇ 8060 ၸဝ်ႈ/ၵေႃႉ (ပီၵၢႆ ဢွင်ႇပူၼ်ႉ 7882၊ ၼမ်လိူဝ်ပီၵၢႆ 178)။ လုၵ်ႈႁဵၼ်းဢၼ်ဢွင်ႇပူၼ်ႉ ၼႂ်းပီၵၢၼ်ႁဵၼ်း 2022-2023 ၼႆႉ မီးယူႇ 71.8 % (ႁူဝ်ပၢၵ်ႇၸဵတ်းသိပ်းဢဵတ်းပၢႆ)၊ ပီၵၢႆ ဢွင်ႇပူၼ်ႉ 90.6 % ၼႆလႄႈ ပေႃး ဢဝ်ႁူဝ်ပၢၵ်ႇမၼ်းဝႃႈ ယွမ်းလူင်းမႃးယူႇ၊ ယွၼ်ႉဝႃႈ ၸၼ်ႉမၼ်းၵေႃႈ သုင်မႃး၊ ဝိၶျႃးမၼ်းၵေႃႈ ၼမ်မႃး၊ လိၵ်ႈမၼ်းၵေႃႈ ယၢပ်ႇတိူဝ်းမႃးလႄႈ လွင်ႈလုၵ်ႈႁဵၼ်းၶဝ် ဢွင်ႇဢေႇမႃးၼၼ်ႉ တိုၼ်းပဵၼ် ၽိင်ႈမၼ်းယဝ်ႉၼႆ ႁၼ်ထိုင်ၼင်ႇၼႆ။
ဢွင်ႈတွပ်ႇလိၵ်ႈၸိုင် ပေႃးဢဝ်တူင်ႇဝဵင်းမၼ်းဝႃႈ မီးယူႇ 39 တူင်ႇဝဵင်း၊ မၢင်တူင်ႇဝဵင်းသမ်ႉ ၶိုၼ်းၸႅၵ်ႇတွပ်ႇ သၢမ်တီႈ၊ သီႇတီႈၵေႃႈ မီးယဝ်ႉ။ ၼႂ်း 39 ၸေႈဝဵင်းၼၼ်ႉ ပဵၼ်ၼႂ်းမိူင်းတႆး၊ မိူင်းယၢင်းလႅင်၊ မိူင်းယၢင်းၽိူၵ်ႇ၊ မိူင်းၶၢင် လႄႈ တိူင်းမၼ်းတလေးၸိူဝ်းၼႆႉသေ ႁူဝ်ၵျွင်း ဢၼ်ၶဝ်ႈမႃးတႅမ်ႈတွပ်ႇ မီး 493 ၵျွင်း၊ ပီၵၢႆ ၶဝ်ႈတႅမ်ႈတွပ်ႇ 463 ၵျွင်း၊ လႆႈဝႃႈ ပီၼႆႉ တိူဝ်းမႃးထႅင်ႈ 30 ၵျွင်းၼႆယဝ်ႉ။
ၼႂ်းသဵၼ်ႈမၢႆဢွင်ႇၼၼ်ႉ ၸိုဝ်ႈလုၵ်ႈႁဵၼ်းၸိူဝ်းၼၼ်ႉ မၢင်ဝဵင်းၵေႃႈ ၶိုၼ်းဝႆႉၸွမ်းၼင်ႇ ဢၼ်ၸုမ်းပၢႆးပၺ်ႇၺႃႇၶဝ် သူင်ႇမႃးပၼ်ၼၼ်ႉၵူၺ်း ဢမ်ႇလႆႈယႃႉသင်၊ မၢင်ႇတူင်ႇဝဵင်း တႅမ်ႈပဵၼ် ပႃႇလိတႆး တႅတ်ႈၼႅတ်ႈသေတ မၢင်ႇတူင်ႇဝဵင်းတေႉ ဢဝ်လိၵ်ႈတႆးသေ တႅမ်ႈမႃးၵူၺ်း။ ထႅင်ႈပိူင်ၼိုင်ႈၵေႃႈ လၢႆးဝႆႉဝၢင်း လႄႈ လွင်ႈသွၼ်ႇထၢၼ်ႈမၢၵ်ႈၼၼ်ႉ ၸၢင်ႈတေမီး တီႈၽိတ်းပိူင်ႈယူႇၵမ်ႈၽွင်ႈ။ ယွၼ်ႉၼၼ် သင်ဝႃႈႁၼ်မႅၼ်ႈၺႃး တီႈၽိတ်းပိူင်ႈၼႆၸိုင် ပွင်ႇၸႂ်ပၼ်သေ ၶိုၼ်းပွင်ႇၶၢဝ်ႇပၼ် ၸုမ်းၽူႈပွင်ၵၢၼ် ၸုမ်းပၢႆးပၺ်ႇၺႃႇႁဝ်းၶႃႈ ႁႂ်ႈၶိုတ်းတၼ်းသေၵမ်းၶႃႈ။